Azken edizioa
"Begiratu urrunera" lelopean banatu ditugu CAF Elhuyar sariak, Sutegi aretoan, Usurbilen. Hauek izan dira irabazleak:
DIBULGAZIO-ARTIKULU OROKORRAREN SARIA
Judith Zubia Aranburu
Dibulgazio-artikulu orokorraren saria Judith Zubia Aranburu arrasatearrak irabazi du, “Garena egiten gaituena, egiten duguna idazteko” izeneko artikuluarekin. Lana saritzeko orduan, epaimahaiak nabarmendu du gaurkotasun bete-beteko gai bati heldu diola egileak, datuen biltegiratze digitalari, eta, arazoa azaltzeaz gain, irtenbide bat ere azaltzen duela modu argi eta ulergarrian.
DOKTORE-TESIAN OINARRITUTAKO DIBULGAZIO-ARTIKULUAREN SARIA
Mattin Urbieta Galarraga
Doktore-tesian oinarritutako dibulgazio-artikuluaren saria Mattin Urbieta Galarragak eskuratu du, “Elektroiekin dantzan nanoeskala argitzeko” lanari esker. Urbieta Debakoa da. Epaimahaiaren iritziz, artikulu osatua eta landua aurkeztu du egileak, eta ondo azaltzen du zertan datzan tesia eta zer ondoriotara iritsi den bere ikerketan.
NEIKER SARIA
Aitor Garmendia Etxeberria
Lehen sektoreko lanak saritzeko helburua du Neiker sariak, eta aurtengo saritua Aitor Garmendia Etxeberria da, “Aralar, balioen eta interesen aniztasuna parke natural batean” lanari esker. Kategoria honetako epaimahaikideek garrantzi berezia eman diote egileak gaurkotasun handiko auzi bati heldu izanari, eta aintzat hartu dute eztabaida handia sortzen duen gaia izanik eztabaida horretan parte hartzen duten eragile guztiak kontuan izatea artikuluan.
ZIENTZIA-KAZETARITZAKO SARIA
Iñaki Sanz Azkue
Zientzia-kazetaritza kategorian, “Dragoi txiki bat egongelako horman” lana izan da saritua.
Epaimahaiak nabarmendu duenez, gai garrantzitsu bat landu du hernaniarrak bere artikuluan: klima-aldaketa. Baina, gaiaz harago, zer ikuspegirekin landu duen iruditu zaio azpimarratzekoa epaimahaiari. Izan ere, klima-aldaketari buruzko artikuluek hondamendi-kutsua izaten dute askotan, eta oraingoan, berriz, egileak xumetik eta txikitik heldu dio, eta estilo argia eta atsegina erabili du. Artikulua Gaur8 astekarian argitaratu zuten iazko uztailean.
Sariez gain, 5.000 euroko dirulaguntza bat ere eman ohi da CAF-Elhuyar sarietan, zientzia eta gizartearen arteko zubi-lana egiten duten proiektuak bultzatzeko asmoz. Aurten, bi proiektuk jaso dute sorkuntza-beka, epaimahaiak beka ex aequo ematea erabaki baitu.
SORKUNTZA-BEKA
Jon Sánchez Carrasco eta Kulturaz Azpeitiko Kultur Kooperatiba
“Semiosi-genesi” eta “Ia dena” lanak izan dira sarituak. Epaimahaiaren esanean, bi lan horiek adimen artifizialaren ertzak esploratzen dituzte, eta erabateko gaurkotasuna duen gai bati heldu diote hainbat alderdi uztartuta: artistikoa, filosofikoa, soziala eta teknologikoa. Bi proiektuak osagarriak eta bateragarriak dira epaimahaikideen ustez; hori da beka ex aequo ematearen arrazoia.
CAF-ELHUYAR MEREZIMENDU-SARIA
Jacinto Iturbe Barrenetxea
Elhuyar Fundazioaren patronatuak CAF-Elhuyar merezimendu-saria ematen du. Sari horren helburua euskaren normalizazioan eta zientzia eta teknologiaren dibulgazioan nabarmendu diren pertsonak omentzea da. Aurten, Jacinto Iturbe Barrenetxeak jaso du aitortza hori, euskara eta zientzia unibertsitatearen eremuan zabaltzeko egindako lan eskergagatik eta zientziaren dibulgazioan egindako ekarpen apartagatik.
Jacinto Iturbe Barrenetxeak (Bilbo, 1951) Kimika ikasi zuen Valladoliden. Euskarazko lehen tesina idatzi zuen, 1974an, eta euskaraz aurkeztu zuen tesia, 1982an, Atomo bakarren detektorearen aplikazio estatistikoak: fluktuazioak eta hipotesi ergodikoa izenburukoa. 1976an, Donostiako Kimika Fakultatean hasi zen lanean. Geroztik EHUko irakasle aritu zen, erretiroa hartu arte. EHUn heldu zion kimikako testuliburuak euskaraz idazteari. Eta garai berean hasi zen UEUrekin kolaboratzen. EHUko lehen euskara-errektoreordea izan zen, eta bera karguan zela sortu zen Ekaia, euskarazko zientzia- eta teknologia-aldizkaria. Zientzia Fakultatean eskolak euskaraz ematen zituzten irakasle aitzindarietako bat izan zen, 1979an.
Epaimahaikideei dagokienez, hauek izan dira dibulgazio-artikuluak eta kazetaritza-lanak epaitu dituztenak: Arturo Elosegi Irurtia, ekologoa eta EHUko ikertzailea; Marian Iriarte Ormazabal, kimikaria eta EHUko ikertzailea; Alberto Barandiaran Amillango, kazetaria eta idazlea; eta Aitziber Agirre Ruiz de Arkaute, Elhuyarreko Kultura Zientifikoko arlo-arduraduna. Neiker sari berezia banatu dutenak, berriz, hauek izan dira: Arantza Madariaga Aberasturi, Elika Fundazioko zuzendaria; Pilar Santamaría Martínez, HAZI Fundazioko arloko burua; eta Rikardo Bueno Zabalo, BRTAko zuzendaria.
Zientzia Gizartean sorkuntza-bekara aurkeztutako proiektuak honako hauek epaitu dituzte: Lorea Agirre Dorronsoro, Jakin Fundazioko zuzendaria; Koldo Almandoz de La Cruz, zinema-zuzendaria; Josu Rekalde Izagirre, EHUko Arte eta Teknologiako katedraduna; eta Irune Bengoetxea Lanberri, Elhuyarreko komunikazio-arduraduna.