Abian da CAF-Elhuyar sariketaren edizio berria. Sariketa honen helburua da zientzia eta teknologiaren arloko gaien eta ikerketen euskarazko dibulgazioa eta kazetaritza bultzatzea, saritzea eta aitortzea, eta gai horiek gizartera hurbiltzea, argazkilaritza-lanak ere aitortuz. Elhuyarrek antolatzen ditu CAF-Elhuyar sariak, CAF enpresarekin batera eta NEIKERen babesarekin.

Aurtengo edizioaren leloa Begi berriz kontatzeko da, berrituta baitator CAF-Elhuyar sariketa. Gizartearen etengabeko bilakaerarekin bat eginez, kategoriak egokitu dira; artikuluak eta audioak saritzeko kategoriei, argazkilaritza zientifikoarena gehitu zaie. Gazteek leku berezia izango dute kategoria horretan, eta argazkien bitartez beren ikuspegia ematera gonbidatuko dituzte.
  

Kategoria hauek osatzen dute sariketa: 

• Dibulgazio-artikuluak. Euskaraz sortutako dibulgazio-lanak aurkeztuko dira, zientzia eta teknologiaren arlokoak.
  • Orokorrak: edozein zientzia- edota teknologia-gairi buruzko dibulgazio-artikuluak. 
  • Norberaren ikerketan oinarritutako artikuluak: zientziako edota teknologiako norberaren tesietan oinarritutako dibulgazio-lanak edota norbere ikerketari buruzko artikuluak aurkeztuko dira.
  • Saria: 2.000 euro, oroigarri bat eta Elhuyar aldizkarirako urtebeteko harpidetza.

• Zientzia-kazetaritza. Kategoria honetan, argitaratutako kazetaritza-lanak aurkeztuko dira, bi formatutakoak.
  • Idatzizkoak: euskarazko hedabide batean argitaratutako zientzia-kazetaritzako artikuluak. 
  • Audioak: zientzia eta teknologiako gaiak gizarteratzeko irrati-piezak edo podcast-audioak, euskaraz sortuak.
  • Saria: 1.000 euro, oroigarri bat eta Elhuyar aldizkarirako urtebeteko harpidetza.

• Argazkilaritza-lanak. Kategoria berri honetara, zientziarekin edota teknologiarekin lotura duten argazkiak aurkeztuko dira. Bi azpikategoria egongo dira:
  • Helduak: 18 urtetik gorakoentzat.
  • Saria: 2.000 euro, oroigarria eta Elhuyar aldizkarirako urtebeteko harpidetza.
  • Gazteak: 14-18 artekoentzat.
  • Saria: zientzia edota teknologiarekin zerikusia duen esperientzia bat gozatzeko aukera (1.000 euro inguruko balioa) eta Elhuyar aldizkariaren urtebeteko harpidetza. 

Horietaz gain, NEIKER saria emango zaio lehen sektoreari lotutako artikulu onenari; 2.000 euro, oroigarri bat eta Elhuyar aldizkarirako urtebeteko harpidetza jasoko ditu saridunak, eta sari hau bateragarria da beste sariekin.

Lanak 2025eko uztailaren 1era bitartean aurkez daitezke, helbide honetan: cafelhuyarsariak.elhuyar.eus