Medikuntza eta Kirurgia Erizaintza irakasgaian, osasun-asaldurak dituzten pertsona helduei eman beharreko
zainketak irakasten dira. Donostiako Erizaintza Eskolan, esandako irakasgaian, lehen kurtsoan lantzen
diren oinarriak eta hiru kurtsoetan zehar ikusten diren prozedurak biltzen dira liburu honetan.

Erizaintza-prozedurak aztertzerakoan, teknikaz haratago joaten saiatu gara. Prozedurak huts-hutsean
azaltzea baino interesgarriagoa iruditu zaigu prozedura horiek erizaintza-zainketetan txertatzea. Pertsonaren
beharrak asetzen laguntzeko, erizaintza-zainketak eskaintzen dira, eta zainketa horien barnean hainbat
prozedura egiten dira; adibidez, pertsona elikatzeko egiten diren prozedurak baliagarriak dira pertsonaren
elikatzeko beharra asetzeko. Landu ditugun prozedurak erizainaren jarduera independentean nahiz interdependentean
kokatzen dira.