Seguran jatorri askotariko emakumeekin komunitatea eraikiz

Txikitasunetik, emozio eta bizipenei leku eginez, jatorri askotariko emakumeentzat ahalduntze sozial eta politiko esanguratsua ekarri duen prozesu batean murgildurik ibili gara azken hilabeteotan.

Aitziber Eguzkitza aritu eta adituarekin batera, Seguran jatorri askotariko emakumeen gizarteratze-prozesuak ezagutzeko eta herritar gisa dituzten behar eta desirak partekatzeko ariketa kolektiboa bideratu dugu.

Etxeko atariak, postontziak eta kalea izan dira komunikaziorako kanalak. Norberaren lehen hizkuntza bermatzea eta hizkuntzen kudeaketa kolektiboa ezinbestekoak izan ditugu.

Prozesuan zehar esanguratsua izan da jatorri askotariko emakumeengan izandako ahalduntze eta gizarteratzea, parte-hartze politikoa handituz, herriko ekimenetan partaidetza eta kaleko presentzia areagotuz, sareak eraikiz eta euskarak irekitzen dituen aukerak nabarmenduz. Gorputzetatik eta egunerokotasunetik eraldatu dugu, apur bat bada ere, Segurako askotariko kulturen arteko elkarbizitza.