Cookie-n erabilera. Webgune honek cookie-ak erabiltzen ditu zure nabigazio-esperientzia hobetzeko. Nabigatzen jarraitzen baduzu, ulertuko dugu cookie horien erabilera onartzen duzula. Informazio gehiago nahi izanez gero, kontsultatu gure cookie politika.

Umoreak, arteak eta materiak egituratu dute On Zientzia bideo-lehiaketaren palmaresa

2018.06.13-(e)n argitaratua Noticias-(e)n kategorian

Zientzia eta teknologiari buruzko bideo laburrak eta originalak ekoiztea eta hedatzea du helburu On Zientzia lehiaketak, zeina Donostia International Physics Centerrek (DIPC) eta Elhuyarrek antolatzen duten Teknopolis telebista-saioaren barruan. Atzo banatu ziren aurtengo sariak, zortzigarrenak jada, Donostiako Tabakaleran. Edizio honetako bideo sarituak ikusteko aukera izan zuten bertaratutakoek. Hiru kategorietako sariez gain, bi aipamen berezi ere banatu zituzten.

                                                                    

Sari-banaketa ekitaldian hauek parte hartu zuten: Tabakalerako zuzendari nagusi Edurne Ormazabalek; Eusko Jaurlaritzako Unibertsitate eta Ikerketa sailburuorde Adolfo Moraisek; DIPCko zuzendari Ricardo Diez Muiñok; CIC nanoGUNEko zuzendari eta Elhuyarreko lehendakari Txema Pitarkek; eta Kimika Fakultateko dekano Marian Iriartek.

Hona hemen bideo sarituak:

  • Dibulgazio-bideo onenaren saria: Patxi Razkin Senar (CAFeko ingeniaria), VACUUM bideoa, materiaren egituraren azterketa zinematografiko bat.
  • Euskarazko bideo onenaren saria: Jon Puignau (bigarren hezkuntzako irakaslea), Vulkano, gizateriaren margolari bideoa, sumendiek historian zer eragin izan duten azaltzen duena margolanen irudikapenen bidez.
  • Gazte Saria: Adrián Gálvez Pantoja (16 urte), Cómo hacer una bomba atómica bideoa, umorez eta freskotasunez azaltzen du bonba atomikoaren sorkuntza-prozesua.
  • Aipamen bereziak: María Miguélez, ¿Qué es eso de la elasticidad? bideoagatik; Diana Gutiérrez Fernández eta Lucía Cornejo Villanueva, Virus como armas contra bacterias patógenas bideoagatik.

Zortzigarren edizio honetan 80 bideotik gora aurkeztu dira, eta irabazleen sariek bideo-lehiaketaren mugak gainditu dituzte. Izan ere, sari nagusia irabazi duen Patxi Razkinek lehengo urtean ere On Zientzia sari nagusia eskuratu zuen, eta bere bideoarekin Californiako Raw Science Film Festival-eko bigarren saria irabazi berri du; Gazte saria eskuratu duen Adrián Gálvezi, aldiz, editorial batek bere bideoaren eskubideak erosi dizkio nazioarteko zabalkundea duen material didaktiko batean sartu ahal izateko.

Saio berezi batean emango du Teknopolis telebista-saioak —ekainaren 16an, ETB1en; ekainaren 17an, ETB2n— sari-banaketa, bai eta saritutako lanak eta saridunen adierazpenak ere.